Auteur/autrice : diana

1. Injany hiran-danitra
Misasak’alina;
Lokanga volamena e,
Tendren’ny masina!
Ny tany dia nangina re,
Nandre ny hira vao;
Ho an’ny olona anie
Ny fiadanana.

2. Ny hiran’ny anjely re
Tsy mba mitsahatra,
Ary ambony rahona,
Ireo masina
Mitendry ny lokangany
Am-pihobiana!
Ho an’ny olona anie
Ny fiadanana!

3. O! ry mivesatra entana,
Ry malahelo ô!
Mba andrandrao ny lanitra,
Henoy ny hira vao!
Ny hiran’ny anjely re
Dia mampiadam-po.
O! mitsahara hianao
Hihaino azy izao!

4. Ny andron’ olombelona,
He fandalovana!
Kanefa hisy tany vao
Izay haharitra.
Endrey ny fiadanana
Ary rahatrizay!
Ny hiran’ny anjely re
Hiredona indray!

1. He, faly ny fanahiko,
Fa avy Ilay Malalako,
Dia Jeso tonga zaza,
Ka mety ho Mpamonjiko,
Na dia tsy mendrika aza
Izaho, ry Jesosy ô!
:,: Raiso ho Anao! :,:

2. Ry Jeso Zazakely ô,
Iriko mafy Hianao,
Avia re, ry Zaza,
Ny foko itoeranao
Na dia ratsy aza
Ka tsy mba mendrika Anao,
:,: Ry Jesosy ô! :,:

3. Endrey ny fitiavanao,
Ry Ray, namoy ny Zanakao;
Izahay, izay fahavalo
Ka ivesaran-keloka,
Avelanao hivalo
Ka hiditra ao an-danitra.
:,: Enga ka ho ao! :,:

4. Endrey ny fifaliana
Tsy tratry ny fisainana
Ataon’ireo anjely
Manerana ny lanitra!
Fa any ny Noely
Hitohy tsy ho tapitra,
:,; Enga ka ho ao! :,:

1. O, mihobia fa teraka
Jesosy Tompo, Zanaka,
Mesia nantenaina,
Mpamonjy sitraky ny Ray
Ho avotra mandrakizay
Ka mendrika ho deraina !
Renao izao
Ny anjely mampiely
Teny soa :
Kristy teraka tokoa !

2. He, tonga ny Mpanavotra
Hanafaka ny tahotra
Mamatotra ny tany ;
Mitondra fiadanana
Ka tena mampihavana
Ny lanitra aman-tany ;
Indro tonga
Ny Mpamonjy mahavonjy
Ny mpanota,
Ka manaisotra ny ota !

3. Omeo voninahitra
Ny Ray, Andriamanitra
Izay Tompom-pamonjena !
Ny Zanaka no raisonao
Fa fananganana anao,
Ny lova dia homena.
Amen, Amen !
Teny soa mamy koa :
Isika lavo
Tonga zanaky ny Avo !

1. Alina masina,
Tonga ny Mpanavotra;
Indro teraka ao Bethlehema
Ny Mpanjakan’i Jerosalema,
:,: Izay mpamonjy anao :,:

2. Alina masina,
Ny anjely midina
Ka miara-mihoby hoe :
Indro ny fiadanam-be,
:,: Jeso teraka izao :,:

3. Alina masina,
Nisehon’ny Zanaka;
Ny mazava niposaka,
Ka ny tahotra afaka;
:,: Mifalia izao :,:

Miposaka ny vonjy,
Endrey ny hafaliana !
Jesosy no Mpamonjy,
Andriam-piadanana,
Ilay Zanaky ny Avo
Dia nidina taty
Hahatonga antsika lavo
Ho zanaka ary !
Manangana olom-bery
Handova lanitra,
Ka dera, laza hery
Ho an’Andriamanitra !

1. Ny andron’ny fahasoavana
Miposaka ho antsika,
Manerana izao tontolo izao,
Ny tarany efa hita,
Ka ravo ny olombelona,
Fa lasa ny alintsika.

2. Niova tery ny alina,
Fa teraka ny Mpamonjy,
Mamiratra re ny lanitra,
Miseho izao ny vonjy,
Ka lasa tokoa ny aizina,
Mihoby ny voavonjy.

3. Na dia ho nahay nihira re
Ny hazo an-ala rehetra,
Ka afa-mikalo ny ravina
Hidera ny Avo Indrindra
Tsy ampy ho fanandratana
Ny Tompon’ny ain-drehetra.

4. Ny feon’ny olonao izao
Misandratra, ry Jehovah,
Hidera ny fitiavanao
Sy ny indrafonao soa
Niaro ny fiangonanao
Hatramin’ny fahagola.

5. Ho any an-tenindrazanay
Izahay re, ry Ray Tsitoha,
Ka hiditra ao an-tranon-dRay
Nomanin’ Ilay Mpialoha;
Ny olonao dia ho tafaray
Hidera Anao tokoa!

1. Jeso Mpamonjy, Ilay Tompon’ny aina, no hita
Nidina teto an-tany hamonjy antsika :
O, mba derao
Izy Mpanavotra anao
Ka mifalia ry mino !

2. Indro ny tenin’anjely milaza ny soa :
Teraka Jeso Mpamonjy antsika tokoa !
O, mba derao
Tonga ny andro vaovao,
Andron’ny Filazantsara !

3. Dia iventesonao hira vaovao re izany ;
Tonga Jesosy hamonjy izay mitomany !
O, mba derao
Afaka isika izao ;
Izy Mpisolo antsika !

4. Tonga ny Tompon’ny tompo hisolo ny ory,
Ka mifohaza ry olona mbola matory !
O, mba derao
Amin’ny feo vaovao
Jeso, Ilay Tompo mahery !

1. Manatona Anao izao,
Ry Jeso, ny madinikao,
Ampandrosy ny dianay
Fa ta hahita Anao izahay !

2. Hidera ny Anaranao
No zava-tianay hatao ;
Miravoravo izahay
Fa teraka ny Tomponay.

3. Ny lanitra nilaozanao
Hanavotra ny olonao,
Ho zanak’Andriamanitra
Hifaly ao an-danitra.

4. Tsy takatray heverina
Ny fitiavan-dalina,
Izay nitiavanao anay
Ka dia misaotra Anao izahay !

5. Tariho, Tompo, izahay,
Ambinonao ny dianay ;
Fa samy ta handray Anao
Izahay mivory eto izao !

6. O, ry Sakaiza maminay,
Mba te ho olonao izahay
Hipetraka eo anilanao
Fa mamy ny fitianao !

7. Raha manana Anao izahay
Tsy hisy hatahoranay,
Fa zaza voamarikao
Ho isan’ny arovanao.

8. Raha ao an-danitra vaovao
Izahay sy ny anjelinao,
Hisaotra sy hidera Anao
Manatrika ny tavanao !