Catégorie : 7.01 – Ny Antson’ny filazantsara

1. Ny perla madio, ny perla vaovao
No tonga hampanan-karenany very.
Ny perla madio katsaho izao;
Ario ny ota, izay mahavery,
Tapaho ny gadra, izay mahamay!
Fa sao ho anjaranao mandrakizay.

2. Ny ota nataonao, ry havana e,
Miteraka gadra, izay mahafaty;
Kanefa maro miezaka re,
Hahazo ny voan’ny ota, ka maty!
Reseo ny ota, reseo izao,
Katsaho indrindra ny perla vaovao!

3. Avia, mpanota, faingàna izao,
Faingàna ka dia hahazo hijery
Ny perla madio, ny perla vaovao,
Izay tonga hampanan-karena ny very.
Ry Jeso, Izay perla madio vaovao,
Avia hampanan-karena izao!

1. Tsy maintsy hateraka indray hianao
Izay ta-handova
Ny lanitra sy ny fiainam-baovao,
Izay tsy miova
Ny havan’ny Tompo ihany
No tena hahazo izany.

2. Ny fo vatolampy esory izao,
Fa tsy hovonjena;
Katsaho ny fo feno aina vaovao
Fa io no ekena
Horaisina any ambony,
Ka tsy hitomany intsony.

3. Ny Tompo mitondra ny hery vaovao;
Fanahy sy afo,
Izay mampiova ny fonao izao
Ho tonga fo nofo;
Ny olona lasan-ko babo
Ho afaka sady hiravo.

4. Ry Masina ô, ateraho indray
Izay mitaraina,
Velomy ny maty hifoha,
Handray ilay tena aina;
Mba raiso , ry Ray be fitia,
Ny zanaka adala nania!

1. Ampihetsehin’inona
izao ireo vahoaka,
Ary iza no arahiny
No dia samy maika ery?
:,:Ry jamba ô, fantaronao,
Jeso mandalo anao izao.:,:

2. Jesosy Iraky ny Ray
Dia sady mety no mahay
Manafaka ny rofinao
Sy mampahiratra anao;
:,:Koa mitsangàna hianao,
Jeso mandalo anao izao:,:

3. 0, ry mivesatra entana,
Hatony ny Mpanafaka!
Ry zaza very hatrizay,
Modia ao an-tranon-dRay.
:,:Ry jamba ô, heveronao
Jeso mandalo anao izao:,:

4. Ny làlan-tsarotrao aty
Tsy misy tsy nalehany,
Ny rofy nositraniny,
Ny maty novelominy.
:,:Ny jamba faly nahare:
Indro, Jesosy mandalo re!:,:

5. Ny indrafony mbola injao,
Mitety izao tontolo izao;
Ny tranontsika alehany,
Ny fo mihidy doniny.
:,:Ampandrosoy Izy hoe:
Jeso ô, aza mandalo re!:,:

6. Fa raha tsy ahoanao
Izao fandalovany izao,
Ka nony efa farany
Vao tia ny hovangiany,
:,:Indrisy! Tsy ho hitanao
Jeso Izay efa nandalo tao:,:

1. He, Jesosy Tompo soa
No miantso mafy hoe:
« Manatàna avokoa
Ry mpanota marobe!
Fa izay manatona Ahy
Tsy mba horoahiko;
Aza manana ahiahy,
Raisonao ny teniko ».

2. Aza mba misalasala
Ka mihevitra hoe:
Sao ny Tompo tsy hamela
Ahy efa diso be.
Tsia, tsia, ry mpanota,
Matokia marina,
Anenenonao ny ota,
Jeso hanamarina.

3. He, ny rany saro-bidy
No mahafa-keloka
Ny mpanota voavidy
Ka miaiky heloka.
Eny, afaka ny revo
Noho ny Mpanavotra,
Ny devoly manandevo
Efa resy lahatra.

4. Ny Mpamonjy mampifidy,
Tsy manao an-keriny,
Ka antsika ny hifidy
Sy handray ny teniny.
Koa raha misy very,
Dia tsy avy aminy;
Ny manao ny mahavery
Dia tsy mba maminy.

1. Manatona, ry malala!
An’i Jeso Tomponao;
Raiso re ny famonjena,
:,:Tsy ho faty hianao.:,:

2. Indro jeso, fa miandry
Mba handray anao izao;
Miverena, aza kivy,
:,: Mazotoa, sy matokia.:,:

3. Aza mba mangataka andro,
Sao, dia tratra hariva ety;
Tahotra sy horohoro
:,: Hampivadi-po anao.:,:

4. Ao ny tany soa homeny
Mampifaly fo ery;
Sady tsy mba misy ratsy,
:,: Mandrosoa ho tonga ary.:,:

1. Ny Mpamonjy be fitia
No miantso hoe: Avia!
Ry mahantra, raiso izao,
Famonjena ho anao.

2. Hoy ny Tompo: Ry mpanota,
Manatona, fa ny ota
Voavela, anaka,
Afaka ny heloka.

3. Teny mamy, re, izany,
Faly ireo mitomany,
Ka araho hatrizao,
Dia ho sambatra hianao.

4. Ry Jesosy, Izay Mpiantra,
Izaho ory sy mahantra,
Ka ampio aho izao,
Fa Mpamonjy Hianao!

5. Efa azoko ny teny
Ka hazoniko ireny;
Hianao, Jesosy ô,
Ampy hiankinako.

1. Ry olom-bery, tsy ho very
Foana ny andronao,
Raha mby an-tsainao,
Fa ny ainao, tsy fanananao.
Ny hery misy, nefa indrisy,
Resim-pahalainana!
Aty an-tany, mora lany
Ny fiainana.
Mba mazotoa, ry havako,
Ka aoka hoheverinao
Ny andro lasa, sao ny asa
Tsy ho vitanao.

2. Ka manenena, miambena,
Mivavaha hianao!
Efao ny ady, ao ny kiady
Voninahitrao.
Mba ahitsio ankehitrio
Ny dia sisa hatrizao,
Fa be ny simban’ny mpanimba
Ka migadra izao.
Sakaiza ô, fantaronao,
Fa nijalian’ny Tomponao
Ny fahotàna tsy ialàna,
Ilalaovanao.

3. Dia mba ampio sy tahio
Izahay, ry Tomponay,
Fa mba hiady ka hitady
Vonjy ho anay.
Homenao soa ny manoa
Amin’ny fotoanao.
O, ry Mpanjaka, avia haka
Ny malalanao.
Ny olonao dia tà-hankao
An-danitra fonenanao.
Ry Jeso tia, mba avia
Faingàna izao!

1. O, ry mpanota aza mandà,
Jeso miantso ka miovà !
Mba manatona Azy izao
Izy hamonjy anao !

Fiv : He, mivoha izao ny lanitra,
Ry mpirenireny lavitra ;
Indro Jesosy, Izy no ao,
Aiza no hisy anao ?

2. Be ahiahy va hianao
No tsy mandroso faingana izao ?
Dia tapaho ny hevitrao
Ka miovà hatrizao !
Fiv : He, mivoha sns…

3. Mba miverena re hatrizao
Ka hararaoty ny andronao ;
Fa ny aty ho simba sy ho lao,
Ka mba modia izao !
Fin : He, mivoha sns…

1. Ry olo-matory ô! Mba mifohaza,
Fa indro Kristy
Ilay Fahazavana Izay tena malaza,
Dia tonga aty,
Ka aza matory
Fa mba atolory
Ny fonao izao,
Mba hanazavany anao.

2. Aty dia matevina sady mahana
Ny zavona be;
Ny sento, taraina sy fitomaniana
Dia misy anie,
Ry olo-mahantra,
Jereo ny Mpiantra,
Henoinao izao:
Jesosy nanavotra anao!

3. Aty dia mangetana sady be ady,
Ka maro no voa;
Tsy tambo isaina ireo mitady
Fiadanana am-po.
Dia aza tomany,
Fa eto ihany
Ilay manome
Ny fahasoavany be!

4. O, miandrandrà ka jereo ao ambony,
Fa atoandro izao,
Falia toa zaza, tahafo ny fony,
Ny Tompo derao,
Na misy ny onja
Sy ota mandoza,
Dia mbola derao
Jehovah Mpiaro anao!

5. O, mendrika hankalazaina Jehovah
Izay manome
Ny làlana sy fahamarinana koa
Sy fiainana be.
Tsilovy, ry Kristy,
Ny làla-mahitsy
Izorako izao,
Tantano re ny zanakao!

1. He, ny fiantsoana
Feno fitiavana,
Teny masina sy to,
Ho anao, ry ory fo.

2. Hoy Jesosy Tomponao
 » Manatona Ahy re, »
« Ry miasa fatratra »
« Sy mivesatra entana! »

3. « Fa Izaho hanome »
« Fitsaharan-dehibe »
« Sy fiainana vaovao »
« Hahasambatra anao ».

4. Ry Mpamonjy tsara ô!
Saotra no atolotro;
Ka ampio aho izao,
Fa manaiky ho Anao.