Catégorie : FFPM

512 – He! matoky aho, Tompo

1. He! matoky aho, Tompo,
Azoko ny teninao;
Teny soa mahafaly,
Teny avy aminao.

Fiv : He!matoky aho, Tompo,
Azoko ny teninao;
Teny soa mahafaly
No omenao ahy izao.

2. Tahotra amana ahiahy
Dia ariako izao;
Fa nomenao toky aho
Sady to ny teninao.
sns…

3. Izay rehetra fahotana
Entiko hesorinao;
Hianao no mahadio.
Ka diovy aho izao.
sns…

4. Mahasasa, mahadio,
Mahavonjy Hianao,
Ka mandray sy mahatondra
Tsara ho an-tranonao.
sns…

5. Jeso Tompo! avy aho,
Avy hankalaza Anao;
Raisonao re izay omeko:
Vola, tena, aina koa.
sns…

511 – Jeso no Sakaiza tena tia anay

1. Jeso no sakaiza tena tia anay,
Izy ta-hamonjy olombelona;
Aoka ho tiantsika ny Mpanavotra,
Fa Izy no Sakaiza mahateo tia.

2. Jeso no Sakaiza ifaliana,
Izy nahafoy ny voninahitra,
Mba hananantsika fanavotana
Sy handraisantsika ny fiainana.

3. Jeso no Sakaiza itokiana,
Izy mahavaly sy mahanatra;
Aoka hinoantsika ny Mpanavotra.
Hahazoantsika fiadanana.

4. Jeso no Sakaiza ivavahana,
Izy mahavonjy ny mpangataka;
Aoka hinoantsika ny Mpanavotra,
Mba handraisantsika fanampiana.

5. Jeso no Sakaiza fiarovana,
Izy maharesy ny mpanohitra;
Iza no hanimba izay arovany?
Aoka hisaorantsika ny Mpanavotra.

6. Jeso ô, Sakaiza! raisonao izao
Ny fisaoran-tsara izay atolotray:
Izahay mpanota te-hidera Anao,
Raiso re ny dera izay aterinay.

517 – Ny alina ho lasa

1. Ny alina ho lasa,
Na ela aza re,
Hipoaka ny andro
Mahafinaritra;
Ny zavona hisava
An-tendrombohitra ao,
Ny vavahady tsara
Ho tsinjoko izao.

2. Mba sarotra tokoa
Ny fiakarana e ;
Mamely mafy koa
Ny rivo-doza be;
Fa he ny mpivahiny
Izay efa trotraka
Tantanan’ny Mpamonjy
Tsy ho solafaka.

3. Ny famonjen’i Kristy,
Ny fanavotany,
No loharano soa
Mangarangarana ;
Nandramako sahady
Ny rano velona,
Ka dia nahazo hery
Am-pandehanana.

4. Ny rano be hitànay,
Ny fefy tsilo koa,
Ny lalana mahàna
Ho afaka avokoa ;
Ka dera, haleloia.
No mendrika hatao
Ambara-pahatonga
Am-pitsaharana.

519 – Mba maniry hody aho

1. Mba maniry hody aho,
Ry Jesosy Tompo ô !
:,: Ka ny foko hatanjaho
Mba hankany aminao :,:

2. Tsy tamana eto aho,
Mampahory ny aty,
:,: Koa dia mitalaho,
Mba hafindranao ary :,:

3. Hody aho, ry Mpiantra,
Aoka mba horaisinao,
:,: Hianao dia feno antra,
Ka matoky aho izao :,:

524 – Hitsahatra aiza, ry foko, izao ?

1. Hitsahatra aiza, ry foko, izao ?
Ka iza ataonao hiaro anao?
Ny tany va misy hitsaharan’ny fo,
Na lova tsy simba, tsy mety ho lo?
Tsia, tsia, tsy mba aty
Izany, fa any an-danitra ery.

2. Afoizo ny tany izay manindao,
Katsaho ny lanitra ho lovanao.
Jerosalema any, tanàna vaovao
Sy tsara tokoa, miandry anao.
Eny, eny, ao dia ao
No misy tokoa fonenam-baovao.

3. Ny mponina ao dia tretrika am-po,
Fa resy ny ota, mahery ny to,
Ka faly midera ny Tompo ny ao ;
Ny mino hihira ny hira vaovao !
Indro, indro, be dia be
Tokoa ny soa ao an-danitra re !

520 – Ny masoandronay

1. Ny masoandronay
Mirefarefa izao,
Madiva hody izahay
Hiverina aminao :

Fiv : Ry Jeso ô! sasao,
Sasao madio izahay.
Ho mendrika ny lanitra
Izay honenanay.

2. Tsy ela intsony koa
Ity ady lava ity,
Ho afa-tsasatra tokoa
Rehefa tonga ary :
sns…

3. Madiva ho hitanay
Ilay Tomponay ary,
Madiva hiahona aminay
Ny namanay taty :
sns…

4. He! kely sisa izao
No hisentoanay,
Dia hofafan’ny tananao
Ny ranomasonay :
sns…

5. Ity hita masi ity,
Izay, tsy mahafa-po,
Hisolo paradisa ary,
Izay hifalian’ny fo :
sns…

521 – Ravoravo re ny foko

1. Ravoravo re ny foko,
Fa Jesosy ao am-poko,
Izy no tsaroako
Amin’ny alehako.

2. Andro fohy, mora lany
No mba ahy aty an-tany,
Fa ny ao an-danitra
Dia tsara lavitra.

3. Tsy mba msiy ota any,
Ka tsy hisy hitotmany,
Tsy mba hisy ny manjo,
Na ny alahelom-po.

4. Any aho no hahazo
Zava-tsoa tsy halazo.
Satroboninahitra,
Haingon’ny nanafika.

5. Dia ao no hahitako
Sady tena hiderako
An’i Jeso avotro
Mifalia re, ry fo !

518 – Rehefa vita ny asako ety

1. Rehefa vita ny asako ety,
Ka ny fanahiko raisina ery,
Miara-mitoetra aminao,
Tomponay,
No hasambarako mandrakizay :

Fiv : Mandrakizay, sambatra re,
Azoko ilay fahasambarana be!

2. Rehefa ataoko veloma ny ety
Ka azoko ‘lay Paradisa ery,
Sady mahita ny tavan’ny Ray
No hasambarako mandrakizay :
sns…

3. Miombom-pahasamabarana ary
Amin’ireo olon-tiako taty
Ka tsy misaraka mandrakizay
No hasambarako mandrakizay :
No hasambarako mandrakizay :
sns…

523 – Te-hifindra

1. :,: Te-hifindra :,:
Aho, ry Jesosy ô !
Be manjo aty an-tany,
Fifaliam-be no any
Aminao, ry Tompo ô.

2. :,: Ny anjely :,:
Sy ny olo-masina
Tafahaona ka mihoby ;
Sambatra ny tafatody.
Faly fa noraisina.

3. :,: Faly koa :,:
Aho, ry Mpamonjiko,
Manantena fa hahita
Ny fonenana ao am-pita,
Ka handray ny lovako.

4. :,: Tsy tamana :,:
Aho amin’ny manjo,
Fa vahiny aty an-tany,
Ka maniry mba ho any
Aminao, ry Tompo ô.

5. :,: Ao tsy misy :,:
Ota na aretina !
Tsara raha hodimandry,
Nefa aho te-hiandry
Ny fetr’andro marina.

522 – He, tanim-pahazavana be.

1. He, tanim-pahazavana be.
Tsy misy maizina ao,
Kany tsy mba hitete
Ny ranomasonao.
Izay voavonjy hiangona ao,
Hiara-mihira ny hira vaovao,
Ho sambatra any an-danitra,
Ao amin’ny Mpanavotra.
Moa ao an-danitra ?
Eny, ao an-danitra.
Ka tsy hisaraka ?
Eny, tsy hisaraka !
Ho sambatra any an-danitra
Ao amin’ny Mpanavotra.

2. Ry Rainay feno indrafo,
Be fitiavana,
Omàny ny fanahiko
Handray fiainana.
Izahay, ry Jesosy, maniry Anao,
Fa maty nisolo anay Hianao,
Nanavotra anay mba ho afaka,
Ka tsy ho voaheloka.
Moa dia ho afaka ?
Eny ho afaka !
Ka tsy helohina ?
Eny tsy helohina
Jesosy Mpamonjy nanafaka,
Ka tsy ho voaheloka.

3. O, ry Jesosy Tompo ô !
Tsarovy izahay,
Ka mba ambino hatrizao
Ny fandehananay.
Vonjeo ny ondry manaraka Anao,
Fa otany no namonoana Anao.
Ho faly izahay ao an-danitra
Ao amim-boninahitra.
Moa ao an-danitra ?
Eny, ao an-danitra.
Ka tsy hisaraka ?
Eny, tsy hisaraka !
Hiara-mifaly ao an-danitra,
Ho feno voninahitra.