Mois : juillet 2009

1. Ry Jesosy ô! indreto
Izahay nasainao eto
Amin’ny latabatrao
Mba talory mofon’aina
O! omeo ranon’aina
Dia ny ra aman-tenanao

2. O! ry Loharanon’ aiko
Tonga aho, fa ilaiko
Hianao Mpamonjiko
Raiso ka diovy aho
Atafo izay mitalaho
Ny sahamarinanao!

3. Ry mpiandry Tsara indrindra
Taomy aho mba hifindra
Ao am-balan’ondrinao
Mamonje ka matahia
Ireto ondrinao mania
Ento any aminao!

4. O! ry Fahazavan’ny saiko
Sady tanjaky ny aiko
Tonga aho, ka vonjeo
Noana ka mitaraina
Mba vokiso mofon’aina
Rano velona omeo!

5. Indro, miankohoka aho
Tompo ô! ka mitalaho
Eto anatrehanao
Aza mba manary ahy
Izay misento sy manahy
Mamelà ny heloko!

6. Ry mpisolo ny mpanota
Izay nandoa ny tambin’ota
Latsa-dra ny tenanao
Raisiko am-panajana
Fa nataonao fanasana
Ireto zava-masinao

1. Ry Kristy ô! malalako
Sakafon’ny fanahiko
Manaraka ny hafatrao
Tsarovako ny tenanao

2. Mangorakoraka ny fo
Fa voavono Hianao
Ka saotra no atolotray
Anao, ry Ilay nalatsa-dra

3. Ny tenanao izay raisiko
Fiainako vaovao tokoa
Ny ranao izay sotroiko
No manadio ny foko koa

4. Ry Kristy ô! ampitomboy
Ny fitiavako Anao
Ny toe-piainako fenoy
Ny tena hamasinanao

5. Atolotro anio indray
Mba ho Anao mandrakizay
Ny tenako, ny ananako
Ny heriko, ny asako

1. Mivoaka ao Golgota
Ilay renirano soa,
Iantsoana ny mpanota
Ho any avokoa ;
Ny ratran’ny Mpamonjy
No loharanon’io,
Ka ony mahavonjy
Sy tena mahadio !

2. Mamelona ny tany
Ity ony soa ity,
Izay rehetra ombany
Miadana ery !
Vahoaka an-tapitr’isa
Izay misotro ao
Mahita Paradisa
Sy fiainana vaovao !

3. Ny fo izay maratra
Ka entina mankeo,
Ny ory sy mahantra
Izay manatona eo :
Mahita fanafody
Ka sitrana avokoa !
Ny ota sy ny rofy
Dia afaka tokoa !

4. Fanahy be ahiana,
Avia misotro ao,
Fa  io no mampangina
Ny alahelonao !
Fanahy ô, hatòny
Ity ony soa ity
Fa io no mahatòny
Ny faniriana aty.

5. Hianao, ry Tompon’aina,
Isaoranay tokoa,
Nanaiky horatraina
Handefa ony soa !
Ny ranao tao Golgota
No iankinanay
Fa mahadio ny ota,
Mamelona aina anay !