Auteur/autrice : nivo

1. Ilay Boky ‘zay nodorana,
Dia may nefa tsy levona;
Izay natao ho lavenona,
Lasa vato fanorenana;
Noheverina ho foana
Kanjo mainka koa velona;
‘Lay nafenina, nalevina,
No nisandratra nivelatra!
Iza moa no hahasakana,
Eny, Iza no hanohitra,
Ilay teny voasoratra,
Dia ny Tenin’Andriamanitra
Zao rehetr’izao ho levona
Fa ny Teny no haharitra.

2. Rasalama nolefonina,
Nisy hafa koa nodorana.
Hantsana no namarinana,
Tora-bato: fahafatesana
Dia tao ireo nampinomina,
Noterena mba hiozona:
Moa izany nampivadika
Kristiana be finoana?
Valin-teny voasoratra
Nentiny nandresy lahatra:
Feo tony, tava mirana,
Feno hery, hasambarana:
« Tsy mba misy hatahorako
Afa-tsy Hianao ry Tompoko »

3. Ilay teny masina sy to
Manambara ry Mpamonjiko
Tena saro-bidy ao am-po,
Ka vakiko sy iainako
Fifaliako, fiarovako,
Fahazavana ao an-dalako;
Koa tanako ho lovako
Sy isaorako ny Tompoko,
Maty aho nefa velona,
Fa Kristy no ahavelomako.
Maty Izy nohomboana
Noho ny fahotana vitako
Nefa Izy dia nitsangana
Santatry ny hitsanganako.

1. Zava-tsoa tokoa ny fitsipikao;
Tompo Andriamanitra ô!
Teny mahasoa, aina, hery koa
Mba ho an’izay manoa.

Fiv :
(Feo voalohany)
Iravoanay
Fa harena be
(Feo faharoa)
Soa tsy manam-paharoa
Ny fitsipikao
Iravoanay fa harena be
Sarobidy tsy hafoy
Izany didinao
(Feo rehetra)
Famonjena ho an’izay mandre

2. Maizana izahay, kely fantatray,
Nefa ao ny teninao:
Jiro sy fanilon’ny tongotray
Hankanesa Aminao
Iravoanay sns…

3. Raha alaim-panahy itony zanakao
Indro, ao ny teninao
Sabatry ny fo, hanoheranay
Ilay ratsy hatrizay
Iravoanay sns…

4. Fifalianay, odi-tahotray
Ny Baiboly taminao:
Avy ny manjo, nefa kosa, Ray
Ao tokoa ny tavanao
Iravoanay sns…

5. Ry Jesosy ô, Mpampianatray!
Maminay ny teninao;
Taomy izahay, mba hahaizanay
Hankato ny didinao
Iravoanay sns…

1. Jesosy tena kiady
Sy reharehanay
Namoha vavahady
Ny tanindrazanay ;
Nampiditra ny Teny
Hampahalala anay
Ny Ray, ny fahendreny
Mba hianaranay

2. Na betsaka mifofo
Ny Baibolinay
Mihaza sy milofo,
Moa ketraka izahay ?
Jesosy no Mpiaro
Ka moa ve ho kivy ve ?
Vao maika mihamaro
Ny mpankasitraka e !

3. Mbola Izy no Filoha
Mpitarika anay,
Hitory ka hamoha
Ireo namanay ;
Vahoaka an-tapitr’isa
no mbola hasondrotray,
Hahita Paradisa
Ho zanaky ny Ray !

4. Ry Jeso, hatanjaho
Ny fiangonana,
Hijoro ho tena taho
Mamoa mandrakizay !
Hianao anie no sandry
‘Zay tena tanjakay
No sady hany andry
‘Zay hijoroanay !

5. Jesosy soa malala,
Tsy foinay Ianao !
Ny fonay dia handala
‘Ty lova taminao
Fanahy ravoravo
Noho ny Teninao
Ry Zanaky ny Avo,
Izao misaotra Anao

1. Ny teny masinao
Torina hatrizao;
Maharitra tsy lo
Mamabo izany fo,
Fa marina ka tianay
Hiainanay mandrakizay.

2. Ny teny masinao
Mitondra hery vao,
Mandrava ny manjo
Ireo ‘zay ory fo;
Ka mendrika ho tanana
Anaty, ho fanana

3. Ny teny masinao
Dia tsy mba mankaleo;
FA hery velona
Mamelombelona;
Ka satrinay ho re indray
Ry Andriananaharinay.

4. Ny teny masinao
No feo manorina;
Ny teny masinao
No feo manarina,
Ka tianay hanenika
Ny tany sy ny lanitra.

1. Mamy ny Teninao,
Jehovah Masina !
Sy to ny Teninao,
Tsy azo ovana ;
Ny lanitra ho levona
Fa tsy simba ny Teninao !

2. Madio ny Teninao
Ka tsara indrindra,
Dia fahendrena
Ho an’ny adala,
Mahafaka ny maizina
Ka mitondra ny mazava !

3. Soa ny Teninao
Mahatsara ny fo
Fa ao no hitanay
Misy Mpanavotra,
Jeso, Loharanon’aina
Mahasasa ny meloka !

4. Irin’ny foko koa
Ny Teny masina
Noho ny harena
Na fananana be ;
Ny Teninao no tanako
Ho lovako mandrakizay !

1. Ny Teny masinao
Jehovah Tompo ô,
Nampanoratinao
Ireo mpanomponao,
Dia tiako ka tanako
Ho lova sy fananako !

2. Ny Teny masinao
‘Zay noteneninao
Milaza amiko
Ny hasoavanao,
Izay harena atolotrao
Ho entiko hidera Anao !

3. Ny Teny masinao

Andriamanitra ô,
Maneho ny fitia
Nataon’ny Zanakao,
‘Zay maty tany Kalvary
Hamonjy ny mpanota ety

4. Ny Teny masinao
No mampianatra
Ny saiko tsy mahay
Mba hahafantatra
Ny zavatra miafina
‘Zay momba ny hasoavanao

5. Ny Teny masinao
Dia tsy mba mety lo,
Izay ambarany
Tsy misy tsy ho to,
Na levona aza ka tsy ao
Izao rehetra ary izao !

1. Ny teninao rehetra
Ry Tompo tia anay;
No tsy mba manam-petra
Fa to mandrakizay;
Ho levona avokoa,
Izao rehetra izao,
Haharitra tokoa
Zao teninao izao.

2. Ny tenin’ny Baiboly
No sabatra entinay
Handresy ny devoly,
‘Lay fahavalonay;
Raha misy mampahory,
Ka osa izahay
Ny teninao mahery
Manjary tanjakay

3. Fa teny mamy koa
Ho an’ny mpankato
Ka loharano soa
Miboika ao am-po
Ho fanomezan-toky
Ny azon’ny manjo.
Sy hani-mahavoky
Mamelona ny fo

4. Fa teny mampisava
Ny aizim-be aty.
Fanilo manazava
Ny dia ho ary
Manolo-pahendrena,
Mananatra ny fo,
Milaza famonjena
Sy lova tsy ho lo.