Catégorie : 06 – Ny Fiangonana

292 – Izahay natao batisa

1. Izahay natao batisa,
Voarain’ny Tomponay,
Ary efa voaisa
Mba ho zanaky ny Ray;
Voavelany tokoa
ny fahadisoanay
Nefa mbola mora resy
Mora simba izahay.

2. Na ny asa, na ny teny,
Na ny hevitra ao am-po,
Mbola tsy madio ireny,
Ka diovy, Tompo ô!
Mora aminay ny ratsy,
Sarotra aminay ny to;
Mba ampio tsy ho resy
Izahay, ry Tompo ô!

3. Raha mbola aty an-tany
Izahay izay zanakao,
Mba ampio tsy ho lany
Ny finoanay Anao.
Ry Jesosy Tompo soa,
Tano mafy izahay,
Mba ho azonay tokoa
Izay anjara lovanay.

291 – Efa tonga zana-dRay Tsitoha hianao

1. Efa tonga zana-dRay Tsitoha hianao,
Ry tanora, tamin’ny batisa masina;
Izany no tenin’ny Tompo

2. Koa aza manadino ny batisanao,
Zava-tsoa sarobidy efa azona;
Tamin’ny ranon’aina.

3. Famelana heloka sy fahasoavana
Fanavaozana ny fo sy fiadanana;
Samy nomen’ny Mpamonjy.

4. Dia arahonao Jesosy, fa Mpamonjinao;
Aoka hahafaly Azy ny fiainanao;
Tovy izay Sitrapony!

5. Mivavaha, miambena ao an-dalana!
Misy fahavalo fetsy ta-hamitaka
Ny ondrikelin’ny Tompo

6. Mahatoky ny Mpamonjy, aza kivy fo,
Izy hampionona, raha avy ny manjo;
Azy ny hery rehetra.

7. Ary raha tapitra ny andronao aty
Endrey ny fifalianao rehefa mby ary;
Amin’ny Tompo Jesosy!

240 – Alahady, andro tsara,

1. Alahady, andro tsara,
Andro fitsaharanay,
Nitsangananao, ry Tompo!
Andronao, Mpanavotray.
Eny, maminay ny andro,
Andro fiangonanay,
Hiderana Anao Mpamonjy,
Sy ny voninahitrao.

2. Tovy aminay ny teny
Izay nataonao fahizay,
Tamin’ny Apositoly
Fony vory toy izao:
« Raha misy roa na telo
Amin’ny Anarako
Vory mba hiantso Ahy,
Ao no hiangonako. »

3. Mba soraty ao am-ponay,
Tompo ô! Ny didinao,
Hiasanay saina tsara
Eto anatrehanao,
Mba avia, ry Jeso Tompo!
Tomoera aminay,
Hitandremanay ny andro
Izay natokana ho Anao.

239 – Ry Jeso! Vory izahay

1. Ry Jeso! Vory izahay,
Fa andronao anio.
Dia avy mba hivavaka
Aty an-tranonao.

2. Ka na aiza no aiza ny olonao
No vory toy izao,
Ny herinao mba asehoy,
Efao ny teninao.

3. Ny hira ikambananay
Aty an-tranonao,
Ekeo ho fanandratana
Ny voninahitrao.

4. Ny vavaka tononinay
Eo anatrehanao,
Mba raiso ho fanatitra
Ankasitrahanao.

5. Ny teny fitarainana
Ataon’ny ory koa
Soloy fifaliana;
Hisaoranay Anao.

6.Ny teninao halahatra
Hambininao anie,
Hamelom-pitiavana
Am-pon’izay mandre.

238 – Mivory eto izahay

1. Mivory eto izahay
Hiantso ny Anaranao;
Jehovah Masina ô!
Dia manomeza anay anio
Ny soa avy aminao,
Ho fitahiana.

2. Ny vavaka tononinay
Miakatra any aminao,
Mpamonjy tia anay!
Mba raiso ao an-danitra
Ho zava-mani-pofona
Izay ho tianao.

3. Ny saotra izay aterinay
Mba raisonao, Jehovah ô,
Andriamanitray!
Ny vokatry ny molotray
Dia aoka ho fanatitra
Ankasitrahanao.

4. Ankehitriny, Tompo ô!
Omeo ny Fanahinao
Hitoetra aminay,
Ho fanalana aizina,
Sy fanoloran-kevitra
Ho an’ny olonao.

236 – Avia, Tomponay! Atrehonao ‘zahay

1. Avia, Tomponay!
Atrehonao ‘zahay;
Fiderana no atolotray
Ho Anao, ry Tomponay;
Tongava aty an-tranonay
Handray ny dera atolotray:
Avia, Tomponay!

2. Avia, Tomponay!
Atrehonao ‘zahay;
Enga ka ho tonga olonao
Zao ‘zahay rehetra izao,
Ny vavanay hidera Anao,
Ny fonay mba diovinao;
Avia, Tomponay!

3. Avia, Tomponay!
Atrehonao ‘zahay;
Ampidino ny Fanahinao
Ho àty an-tranonay;
Ampionao koa ny olonao,
Hilaza anio ny teninao:
Avia, Tomponay!

4. Avia, Tomponay!
Atrehonao ‘zahay;
Fiderana no atolotray
Ho Anao, ry Avotray! ray!
Mba raisonao, ny deranay,
Efao, tokoa ny hatakay:
Avia, Tomponay!

235 – Tafavory izahay

1. Tafavory izahay
Eto anatrehanao,
Ry jehovah Tomponay
Mba hivavaka aminao.

2. Te-hianatra izahay
Mba hanao ny sitrakao;
Mihainoa ny vavakay,
Manampia anay izao.

3. Fa mangataka aminao
Fanampiana izahay;
Raha tsy ampianao,
Dia ho diso izahay.

4. ‘Zay rehetra anananay
Entinay midera Anao,
Aoka hazoto izahay
Mba hanao ny sitrakao.

5. Aoka handroso izahay
Mba hanompo tsara Anao
Dia hifaly izahay
Amin’ny fitianao.

234 – Mahery Ianao

1. Mahery Hianao,
jehovah Tompo ô!
Mombà anay mpanomponao,
Ka miarova anay.

2. Mpanjaka Hianao
Ry Zanahary ô!
Avia, anjakao izao
Ny ao anatinay.

3. Miaro Hianao,
Andriamanitra ô!
Hidera sy hisaotra Anao
No iangonanay.

4. Miantra Hianao,
Ry Tompo tia ô!
Tongava aminay izao
Mba hifalianay.

5. Ny fanomezan-tsoa
‘Zay maminay tokoa
Dia jeso ‘lay malalanao
Nafoy ho Avotray.

6. Mba raisonao, ry Ray!
Ny saotra entinay,
Ny dera, laza, hery koa,
Anao Mpanjaka soa.

233 – O! Ray Malala, asehoy

1. O! Ray Malala, asehoy
Ny hasoavanao;
Sasao ho afa-keloka
Izahay ho zanakao:

Fiv : Ho mafy ny fiezakay
Handia ny lalanao,
Tsy hisy hijanonanay,
Raha tsy an-tranonao.

2. O! Ray Malala, mba henoy
Ny feonay zanakao;
Tantano ao an-dalana
Hankany aminao:
Ho mafy, sns…

3. O! Ray Malala, hitanao
Ny hasambaranay;
Ny avotr’ain’ny Zanakao
No itokianay:
Ho mafy, sns…