1. Avia Fanahy Masino ô,
Midina eto aminay
Fenoy ny hasoavanao
Ny fonay noforoninao !
2. Tongava ry Mpananatro ô,
Nomen’Andriamanitra
Ho loharano velona
Hiboiboika ao am-po !
3. Sokafy ny fanahinay
Hidiram-pitiavana !
Ny tenanay malemy koa
Ampaherezonao anie !
4. Reseo ny fahavalonay
Onòny koa ny tahotray ;
Tantano ao an-dalana
Hahatraranay ny lanitra !
5. Tahio mba hitiavanay
Ny Ray sy Jeso Zanany,
Sy hitokianay Anao
Izay Fanahy Masina !
1. Avia, Fanahy ô,
Fanahy Masino ô!
Midina eto aminay
Hitari-dalana.
2.Fa diso làlana
Ka ory izahay;
Ny sainay dia maizina,
Ny fonay ratsy koa.
3. Midina Hianao,
Ry Mpanazava anay,
Hanaisotra ny aizina
Aty anatinay!
4. Avia Mpananatro ô!
Mombà anay tokoa;
Ampahatsiarovinao!
Ny teny mahasoa,
5. Ry Mpampianatra ô!
Ampionao izahay
Ka aoka re ho marina
Izay ianaranay!
6. Mitomoera aty
Anatin’ny fonay;
Izany indrindra Tompo ô,
No angatahinay!
1. Fanahy Masina ô!
Ny hevitray izao
Ovay ho vao;
Vonoy ny otanay,
Diovinao ‘zahay
Ka ny fanahinay
Onenonao.
2. Fanahy Masino ô!
Tsinjovinao izao
Ny olonao;
Mpananatro ô! Ovay
Ny eritreritray;
Ny hadisoanay
Esorinao.
3. Fanahy hendry ô!
Jereo ‘zahay izao!
Ka hazavao;
Adala izahay,
Mania ny hevitray;
Dia atoroy anay
Ny lalanao.
4. Fanahy Masino ô!
Mba asehoy izao
Ny antranao;
Be tahotra izahay,
Henoy ny hatakay,
Ka ny fanahinay
Ononinao.
1. Hosana! (in-3)
Hosana no asandratray
Ho an’i Jesosy,
Fa Izy no Mpanjakanay
Sy Tompo tia koa;
Fiv : Hosana no atolotray
Anao, ry Tomponay!
:,: Ity no andro Jobily
Ka hifalianay.:,:
2. Hosana! (in-3)
Hosana ho Anao anie,
Ry Kristy Tomponay!
Fa avy Hianao tokoa
Hanjaka aminay!
Hosana, sns…
3. Hosana! (in-3)
Hosana! Fa ho sambatra.
Izay mpanomponao;
Tsy hisy fahoriana
Ety an-taninao!
Hosana, sns…
4. Hosana! (in-3)
Hosana! Fa miomana
‘Zahay vahoakanao
Hitsena Anao Mpanjakanay
Raha avy Hianao!
Hosana, sns…
5. Hosana! (in-3)
Hosana! Raisonao tokoa,
Ry Tompo tianay,
Ny dera, laza, saotra koa,
Izay aterinay!
Hosana, sns…
1. Hoderaiko lalandava
Jeso ‘Lay Mpanavotro !
Noho ny fitiavana ahy,
Maty mba ho soloko.
Fiv : Hoderaiko, hoderaiko
Fa ny rany masina
Nentiny hanavotra ahy :
Afaka ny heloko !
2. Holazaiko lalandava
Ny tantara mamiko,
Zay nitadiavana ahy
Very noho ny heloko !
Hoderaiko, sns…
3. Hohiraiko lalandava
‘Zao ny voninahiny,
Fa ny fahafatesana aza
Resy noho ny heriny !
Hoderaiko, sns…
1.Ry Jeso, ny fitiavanao
No ifalianay,
Fa voavono Ianao
Hisolo voina anay !
Fiv : Mba raisonao re
Ny saotra aterinay izao,
Ho fanajana
Anao Mpamonjy tia !
2.Mahery ny fitiavanao
Ka itokianay ;
Izay mikambana Aminao
Dia tsy hangahiahy
Mba raisonao, sns…
3.Ambony ny fitiavanao
Ka tsy mba takatray !
Kanefa noho ny herinao
Hiezaka izahay
Mba raisonao, sns…
4.Hiezaka izahay, Jeso,
Ka mba ho tia Anao,
Ka tsy hatahotra eso koa
Noho ny Aminao !
Mba raisonao, sns…
1. Ry Tompo Andriamanitra,
Mpanao izao rehetra izao!
Midera Anao ny lanitra,
Ny tany koa mitsaoka Anao.
2. Hianao no Ray mandrakizay,
Mpanao izao tontolo izao.
Tongava re, ka mba tahio
Ny vavakay atao anio.
3. Ry Kristy ô, Mpanavotra,
Mpamonjy be fìtia tokoa;
Hianao no Zanaky ny Ray
Ka mendrika haja, saotra koa,
4. Fanahy Masino ô, avia,
Sasao ho voadio izahay
Hanoa sy hanara-dia
Ilay Mpamonjy Tomponay.
5. Anao ny voninahitra
Sy dera tsy mitsahatra
Ry Telo izay Iray, Tsitoha.
Ray, Zanaka, Fanahy koa.
1. Atolotray hatao batisa
Ny zanakay, Jesosy ô!
Irinay izy mba ho isan’ny
Zaza tezainao.
2. Izahay izao efa nifidy
Anao handray ny zanakay:
Ka raiso izy fa voavidy
Tamin’ny ranao koa.
3. Soraty izy mba handova
Ny lanitra fonenanao,
Ka ny fanahinao hanova
Ny fony ho Anao.
4. Tahio ny fahazazany
Ho fanorena-marina;
Ampianaro azy izany,
Mivavaka aminao.
5. Tantano izy mandra-pita,
Ho tonga ao an-danitra,
Ka aoka izy mba hahita
Anao an-dàlany.
6. Ka amin’ny fotoana feno,
Handaozany ity tany ity,
Omeo toky, iteneno:
« Ndeha hody, anaka. »
1. Tompon’ny lanitra ô! Mba tahio
Izy izay ta-hanatona Anao,
Ka ta-handray ny batisa anio,
Sady maniry mba ho zanakao.
2. Ampifalio ny fony, izay ory
Sady miaiky ny ota natao,
Ary ny ratsy maniry fongory,
Ka mba omeo ny aina vaovao.
3. lzy manaiky hitana ny soa
Sady mandà ny devoly izao;
Aoka hiseho ho mpino tokoa
Amin’ny fomba sy asa vaovao.
4. Afon’ny lanitra ôl Mba avia,
Ka ateraho ny fony izao,
Ary tarihonao mba tsy hania,
Fa te-ho sambatra ao aminao.
5. Andriamanitra Ray be fitia,
Taomy ny maro hanatona Anao,
Ny Fiangonanao, ho be mpitia,
Ho marobe ny ankohonanao’
1. Ry Tompo ô! Tsinjovinao
Ny mila famonjena,
Ka hatao batisa izao,
Satria manantena
Ny tany namboarinao,
Ho an’izay mpianatrao
Ho lovany tokoa.
2. Fa Hianao dia tsy mandà
Ny ory sy mpanota,
Izay nandatsahanao ny ra
Hanaisotra ny ota;
Ka tonga izahay izao,
Mitady hodiovinao:
Mba raisonao ny fonay.
3. Mifona, Tompo, izahay
Izay efa voaisa
Ho olonao, izay nandray
Ny soan’ny batisa;
Ampaherezonao ny fo,
Mba tsy hafoinao ny to,
Ambara-pahafaty!